Ljósið í myrkrinu!

Vildi bara gleðja ykkur aðeins, eða þá sem vilja láta gleðja sig, bjó til smá myndband. Er að prófa svona, ótrúlega gaman!



Knús á línuna!

Taut, enginn Dalai Lama

Allstaðar fær maður nú ruslpóst, það er ekki nóg með að maður fái leiðinleg lottery skilaboð á venjulegum e-mailum, heldur þarf maður líka að þola allskonar póst á facebook og hér á blogginu. Mikið óskaplega getur það nú verið langsótt..

Eins og þið kannski lesið úr þessum orðum er ég búin í skóla og byrjuð að vinna, í góðra vinnufélagshópi er gott að vinna. Þó svo að ég sé sú leiðinlega í vinnunni að fólkið getur ekki unnið á skrifstofunni - er sko að skanna inn myndir og auðvitað vælir skanninn eins og honum sé borgað fyrir það. Ég hélt hann hefði gefið upp öndina í fyrradag, fyrsta deginum í vinnunni.. mikið var ég nú hrædd en fegin innst inni, en svo fór skanninn í lag þegar ég var búin að  prófa að taka hann úr sambandi og setja aftur í samband. Svo ég hélt bara áfram að vinna!

Í gærkvöldi hjálpaði ég Röggu og Gauta, foreldrum Rafns í Cafe Tulinius, kaffihúsi sem þau opnuðu í dag. Ótrúlega notalegt hús rétt fyrir ofan bryggjuna, gamalt kaupmannshús. Yndislegt alveg að það sé loksins komið alvöru kaffihús, finnst frekar fyndið að ég var að fussa því fyrir ekki svo mörgum mánuðum að það skildi nú ekki vera kaffihús á svæðinu. En nú er það komið og ég hvet alla til að kíkja við á Cafe Tulinius!

Jæja, þá er það komið til skila, ég s.s. er lifandi!!

Skólaferðalag upp á Vatnajökul

 

Eins og hér sést, þá datt ég á andlitið á skíðum, enda bara gaman að vera mest slasaði aðilinn í skólaferðalaginu. Þurfti endilega að hreppa að mér þeim titli, og skólaslit á morgun.
Ég er frekar bólgin á kinnini, en það er allt í lagi - fæ bara verðskuldaða athygli.

Annars var mjög gaman uppá jökli, enda ekki við öðru að búast, fór reyndar ekki aftur á skíði eftir að ég datt, en það er saga til annars bæjar.

ætli ég hafi ekki bara einhverja myndasyrpu til að lýsa ferðinni og upplifuninni.

Og fyrir þá sem ekki vita það, þá var þetta í annað skipti sem ég fer á skíði á ævinni, svo að ég má vera klaufi!

Það er náttúrulega bara magnað hvað útsýnið er yndislega fallegt þó fyrir litla fjölbreytni. Það var svolítil þoka, en ekki alltaf. Himininn var blár og allt var svo fallegt. Við fórum í jeppaferð og vorum dregin upp á sleðum og látin renna okkur niður til baka (ég einmitt datt..) og þetta var bara mjög vel heppnað!

Ótrúlegt að ég skuli ekki hafa farið þangað áður, en ég stefni algjörlega á það að þangað verð ég að fara aftur!!

 

 

 

 

 

 

 

 

 

 Bjarney og Símon í góðu skapi á leiðinni uppá jökul                         Þarna vorum við komin uppá jökul!

 

 

 

 

 

 

 

 

 

 

Þarna var ég töff...                                                             Ég og Yrsa.. ég missti algjörlega kúlið þarna...

 

 

 

 

 

 

 

 

 

 Við Rafn mætt í jeppaferðina!                                                 Þessi er tekin uppá Vatnajökli

 

Ég nenni ekki að setja fleiri myndir, kannski seinna, en það var allavega rosalega gaman!

Knús!

Moggabloggari fallinn í sundi

Eða það heldur hún, á bara eitt próf eftir, held að ég sé búin að ná sögu 103 og grunnteikningu 103, svo kemur það bara allt í ljós á föstudaginn þegar að útskriftinni er lokið. En ég er alveg handviss um að ég sé fallin í sundi - enda seint talin góð sundmanneskja þegar kemur að tímatöku.

Sá hlær best sem síðast hlær, en þar sem ég hló fyrst að þessu veit ég ekki hver hlær betur.

Sólin hefur aðeins fengið að skína á mig, enda sjást freknurnar bara vaxa framan í mér, brann örlítið í gær meira að segja. Nú rignir bara og vindurinn hvæs, og ég velti því fyrir mér hvort að sumarið sé bara búið núna. Eða er spáð betra veðri?
Ekki veit ég það, ég er ekki góð í að sjá hvað kemur í veðurfréttum.

Ég held að sumarið sé komið svolítið á hreint hjá mér, hvar ég vinn og svoleiðis. Engar íþróttir svo að ég ætla bara að gera eitthvað ótrúlega skemmtilegt í mínum frítíma!

Mig langar að setja hérna inn fyrir ykkur trailer úr stuttmyndinni minni sem ég er að bardúsa í, hún mun samt örugglega verða til, bara trailerar..




Ég ætla að reyna að lofa því að verða duglegri að blogga þegar að skólanum líkur, við förum upp á jökul á þriðjudaginn og skólinn er eiginlega formlega búinn, en þó eitt próf eftir!

Hafið það sem allra best þangað til næst!

Leti, leti, leti!

Ég verð eiginlega að sýna að það sé lífsmark hérna megin, einu kvartanirnar sem ég fékk voru frá Rafni að ég skildi ekki blogga.. frekar fyndið !

Prófin eru tæknilega byrjuð, tek 11 próf í allt, 8 í Heppuskóla, 2 í FAS og 1 í Tónskólanum! Svo að það er nóg að gera, fór í tvö próf í vikunni sem er liðin og tek 3 í þessari viku og afganginn í næstu. Svo það má segja að ég hafi nóg að gera, er smá byrjuð að læra - og tilhlökkunin er svo mikil hjá mér að komast í sumarfrí að það er eiginlega ekki sniðugt!

Mig langar ótrúlega að skrifa um eitthvað áhugavert, en ég veit ekki hvað, verkefnið sem ég fór í " mynd á dag í ár " gengur ágætlega. Heyriði, á fimmtudaginn fór ég á Vorhátíðina einu sönnu, síðasta grunnskólaballið sem ég fer á!
Veit að allir hafa mikinn áhuga á að sjá myndina sem var tekin af okkur Rafni, við fengum titilinn par ársins, fyrsti titill sem við fáum..



Svo ykkur til mikillar skemmtunar þá verð ég að láta fylgja video sem ég gat loksins klippt og sett á netið, pabbi straujaði tölvuna í dag nefninlega!



Þetta er tekið fyrir frekar löngu og ég er orðin mun betri.. í alvöru!

Ég er..

ÓSAMMÁLA PUNKTUR IS

og ég veit að það eru margir ósammála með mér, ég vil ekki ganga í ESB, verð bara að auglýsa linkinn þar sem ég hef ekki aldur til að geta skráð mig. Voða er Ísland kjánalegt!

Hver vill ganga í ESB, réttupphönd?

Ekki ég, þar sem ég vil ekki þurfa að fá þetta bull allt í bakið á mér í framtíðinni, þegar ég verð nógu fullorðin til að mega kjósa.. næstu kosningar eru þegar ég verð tvítug!

Annars segi ég, ef við förum í þetta blessaða ESB, alveg eins og útrásarvíkingarnir; ÚT VIL EK!


Vildi annars skila kveðju á liðið, fer á morgun til Egilsstaða á stærstu leikhátíð Íslands hingað til, Þjóðleik, á vit ævintýranna, pottþétt þar sem ævintýrin gerast fyrir þá sem langar til að leggja leiklist fyrir sig í framtíðinni.. þokkalega!

splæsi í knús á liðið, nokkur

Stjórnmála-, skútu- og almennt blogg!

Ég er eiginlega alveg mát. Mig langar ekki til að skrifa um neitt, en samt langar mig til að skrifa um allt.

Það er eitt sem fer virkilega í taugarnar á mér, stjórnmálaflokkar, ekki vegna fólksins eða stefnu þeirra, heldur hvað stefnurnar eru óskýrar. Og stefnuskráar allra flokka svipaðar, einn flokkurinn vill aðgang í ESB, einu sinni vildu megnið af hægri flokkunum ganga í ESB, en ekki lengur.

Ég myndi algjörlega standa á krossgötum ef ég mætti kjósa, en ég myndi taka einhverja afstöðu, er eiginlega fegin því að þurfa ekki að taka þessa afstöðu. Þar sem maður sér engan veginn fyrir endann á stefnuskrám flokkanna og hverju þau lofa sem mun bara fljúga með vindinum seinna meir. Allir flokkarnir komast upp með þetta, lofa loforði sem er engan veginn hægt að egna. Draumkennd loforð ættu þau að kallast.

Stjórnmálamenn standa með sínum flokki en falla fæst, þau eru of ánægð með sjálfa sig að þau trúa því ekki að eitthvað sé á þeirra ábyrgð og er þeim að kenna. Þau standa og benda á hvort annað, svo endar með því að einhver einn þarf að taka á sig alla sök.

Að allt öðru, þá hef ég aðeins heyrt í þyrlum í dag og í nótt, skildi hvorki upp né niður, magnað hvað allt fer fram hjá manni. En ég ætla að gerast sannur Hornfirðingur og vera stolt af því að þetta sé að gerast hér og ætla að gera þvílíkt úr þessu... bara seinna!

Annars var páskafríið mitt ágætt, átti yndislegan dag með Rafni, tók fullt af myndum, fór einu sinni á hestbak með Bjarney og út að taka myndir af Yrsu!
Núna erum við mamma farnar að ganga upp Almannaskarðið og út að hjóla, voða stuð.

Ég veit upp á mig sökina, hve löt ég er að blogga getur enginn afsakað. En ég get afsakað mig út komandi viku, á morgun verður ströng leikæfing, á þriðjudaginn sýnum við hér á Höfn, út í Mánagarði og hvet ég sem flesta sem misstu af sýningunni að koma og sjá. Ef mér skilst rétt þá kostar 1000 kr. á þessar tvær sýningar hjá okkur, sem eru kjarakaup!
Á fimmtudaginn höldum við austur á Egilsstaði á leikhátíðina Þjóðleik og sýnum þar og kynnumst krökkum, horfum á leikrit og fáum gagnrýni að ég held á okkar verk, bara stuð.

Smá kveðja!

Ég vildi bara óska öllum gleðilegra páska og farsældar á nýju ári!

Set inn mynd gærdagsins af flickr, ef þið klikkið á myndina færist þið yfir á ljósmyndasíðuna mína!

Bestu kveðjur,
Róslín Alma!

Ljósmyndaferðir innanlands

Ég afrekaði sko margt í dag, eða nei, í gær, 4. apríl.
Allt annað en að taka til!

Mamma dró mig, stelpuna með flensuna, út að taka myndir í ljómandi góðu veðri. Fórum hjá Hvammi, ekki í Lóni, eða er það í Lóni, nei, hvar er Hvammur þá?
Spyr sá sem ekki veit.

Gengum inn í dal, ég vissi náttúrulega ekkert hvert við værum að fara, hélt um stund, okkar á milli, að konan ætlaði að draga mig upp á fjall og hrinda mér niður eða eitthvað. Hef lesið alltof mikið af þannig sögum víst. En já, allt í lagi með það, við gengum inn dalinn og svo þurftum við að fara upp brekku. Ég er ekki að grínast, en ég hélt að ég væri að andast, sem betur fer var aðstoðarmanneskjan (elskuleg móðir mín) mín með vatnsbrúsann minn. Ég var og er reyndar svo andstutt útaf þessu kvefi.

Komst að því líka að ég ætti ekki að fara í neinar göngur þar sem ég stíg alltaf á bestu staðina til að sökkva ofan í jarðveginn. Nema að jörðin sé svona skotin í mér. Nei, kannski ekki.

Það gekk bara yndislega vel að taka myndir, ætla að setja inn núna, er komin með fyrir gærdaginn, svo förum við mamma aftur í dag (það er sunnudagur, núna) að taka myndir í Vestur, fórum Austur sko í gær.

Leyfi mynd gærdagsins að fylgja með

Ef þið klikkið á myndina flytjist þið yfir á myndasíðuna mína, þar getið þið séð fleiri myndir.

Eigið góðan sunnudag og yndislegt páskafrí elsku fólk!

Fyrsti apríll

Mér finnst 1. apríl ekki fyndinn dagur. Nema þegar mér tekst að gabba fólk yfir þröskulda. Plataði einn bekkjarbróðir minn, með öðrum bekkjarbróðir, sögðum honum að hann ætti að sækja eitthvað próf niður. Hann fór. Kennarinn tók eftir því að hann var að fara þegar hann var kominn fram, ekkert sérlega glöð. En þetta var samt fyndið!

Hringdi í Sædísi sys og upplýsti henni að það væri rýmingarsala í Faxafeni, hægt að fá tölvur á 20 þúsund, að pabbi hafi leyft mér að fá tölvu, hvort hún gæti ekki farið og keypt eina slíka fyrir mig. Hún var alveg örugglega nývöknuð þar sem hún tók þessu alveg, ætlaði að hugsa sig um og hringja í mig.

Umsjónarkennarinn minn, Berglind, hún plataði mig, eða sagði að þetta væri ekki aprílgabb og sendi mig niður að tala við Flóru, sem er í móttökunni eða hvað sem það er nú kallað að tala eitthvað við hana. Ég fór og þar var bara aprílgabb í gangi!

Ég þoli ekki aprílgöbb...


Annars frétti ég af því að það væri verið að hugsa um það að fara að selja aðgang að blog.is, vorum nokkur að pæla að skrifa undirskriftarlista fyrir að vilja ekki hafa það svona háa upphæð, erum að tala um 4000 fyrir 3 mánuði!
Það er hægt að skrifa á þennan lista í Hagkaupum í Smáralind!